Mene je najidila Sveta Lucija! Znon ca ćete sad reć, reć ćete: “Molo, ne zafrikovoj!“

Ma kako te je mogla najidit sveta žena ca darove nosi? E, a mogla je! I to da vidite kako me je najidila, ma propija do suz!

Svakega božjega godišćo slušon kako mi se prijatejice folidu ca in je Sveto Lucija lipega donila. Govore mi i Peri i Lena:  Meni je Sveta Luce donila čikulote, meni korokonta, a meni punu zdilu bruštulonih omendulih…

Cinidu mi zazubnice jerbo meni… Meni bidnoj svakega godišća ona donese uvik isto. U  carvenu kalcetu na prog od ponistre stavi za mene darove, a u nju bude šakica suhih smokvi, šakica omenduli, dvo-tri rogoca, jedna naronca, jedna velika kapula i …Šiba!

Pari mi se da mi se Sveta Lucija rugo. I di onda neću bit tužna i žalosna?

E, ma jo son je odlucila čapat vega godišća i ne je pustit od sebe sve dok i meni iz one svoje vriće ne izvadi cagod lipega, pinku gulošćini. I tako som odlucila ostat budna i docekat je na dilo. Svu noć ću je cekat, ako bude potriba.

Ca ona misli, ku som jo?! Neka mi onda rece zoc su Peri i Lena boje od mene kad im boje darove nosi, ili neka i meni do vej jedonput kako i njima. Sinoć son rano legla u posteju i onu carvenu kalcetu za darove butala blizu glove, da je cujen kad mi dojde u kamaru. Naumila son je čapat za rukov.

Cekon je jo, cekon i cekon… Ma mi ni došla! Ni je bilo cilu cilcatu noć!

A onda me je ujutro probudila mater  i rekla: Koko možeš spat Jube moja, ustan se. Evo ti je bila! Ma ni mogla noć tvoju kalcetu. Nisi je ostavila u ponistru kako je red, pok ti je darove stavila u carveni saketić. U cudu som sela na posteju, a onda žejno istresla iz njega sve u krilo, a ono…

Tugo moja, opit isto: šakica suhih smokov, šakica omendulih, dvo-tri rogoca, jedna naronca, jedna velika kapula i …Šiba!

Drogo moja Sveto Lucija, ma ca ti nimoš gori, na nebo, cagod bojega i za mene,  kroz suze son je vikala, materi u krilo.